ಜಗತ್ತಿನ ದೇಶಗಳಾದ್ಯಂತ ಮಾನವ ಸ್ವಾತಂತ್ರ್ಯದ ಅಂತರರಾಷ್ಟ್ರೀಯ ಅಧ್ಯಯನದಲ್ಲಿ ೧೬೫ ದೇಶಗಳಲ್ಲಿ ಭಾರತ ಗಣನೀಯವಾಗಿ ಕುಸಿದಿದೆ

ಕೆನಡಾದ 'ಫ್ರೇಸರ್ ಇನ್ಸ್ಟಿಟ್ಯೂಟ್' ಜೊತೆಗೆ ಅಮೆರಿಕ ದೇಶದ  'ಕ್ಯಾಟೊ ಇನ್ಸ್ಟಿಟ್ಯೂಟ್' ವೈಯಕ್ತಿಕ, ನಾಗರಿಕ ಮತ್ತು ಆರ್ಥಿಕ ಸ್ವಾತಂತ್ರ್ಯವನ್ನು ಒಳಗೊಂಡಿರುವ ವಿಶಾಲ ಅಳತೆಯ ಆಧಾರದ ಮೇಲೆ ವಿಶ್ವದ ಮಾನವ ಸ್ವಾತಂತ್ರ್ಯದ ಸ್ಥಿತಿಯ ಅಧ್ಯಯನವನ್ನು ನಡೆಸುತ್ತಿದೆ. ಮಾನವ ಸ್ವಾತಂತ್ರ್ಯವು ವ್ಯಕ್ತಿಗಳ ಘನತೆಯನ್ನು ಗುರುತಿಸುವ ಸಾಮಾಜಿಕ ಪರಿಕಲ್ಪನೆಯಾಗಿದೆ.  ಈ ಅಧ್ಯಯನದಲ್ಲಿ ಮಾನವ ಸ್ವಾತಂತ್ರ್ಯವನ್ನು ನಕಾರಾತ್ಮಕ ಸ್ವಾತಂತ್ರ್ಯ ಅಥವಾ ಬಲವಂತದ ನಿರ್ಬಂಧದ ಅನುಪಸ್ಥಿತಿ ಎಂದು ವ್ಯಾಖ್ಯಾನಿಸಲಾಗಿದೆ. ಸ್ವಾತಂತ್ರ್ಯವು ಅಂತರ್ಗತವಾಗಿ ಮೌಲ್ಯಯುತವಾಗಿದೆ ಮತ್ತು ಮಾನವ ಪ್ರಗತಿಯಲ್ಲಿ ಪಾತ್ರವನ್ನು ವಹಿಸುತ್ತದೆಯಾದ್ದರಿಂದ, ಅದನ್ನು ಎಚ್ಚರಿಕೆಯಿಂದ ಅಳೆಯಲು ಯೋಗ್ಯವೆಂದು ಪರಿಗಣಿಸಲಾಗುತ್ತದೆ.  ೨೦೦೮ ರಿಂದ ೨೦೧೯ ರವರೆಗೆ ದೇಶಗಳ ಶ್ರೇಣಿಯನ್ನು ನಿರ್ಧರಿಸಲು ವಾರ್ಷಿಕ ಮಾನವ ಸ್ವಾತಂತ್ರ್ಯ ಸೂಚ್ಯಂಕವು  ೮೨ ಸೂಚಕಗಳನ್ನು ಬಳಸಿದೆ.

ಸೂಚ್ಯಂಕದಲ್ಲಿ ಭಾರತವು ೧೬೫ ದೇಶಗಳಲ್ಲಿ ೧೧೯ ನೇ ಸ್ಥಾನದಲ್ಲಿದೆ.

೨೦೧೩ಮತ್ತು ೨೦೧೯ ರ ನಡುವೆ ಆರ್ಥಿಕ, ವೈಯಕ್ತಿಕ ಮತ್ತು ನಾಗರಿಕ ಸ್ವಾತಂತ್ರ್ಯಗಳ ವಿವಿಧ ಸೂಚಕಗಳಲ್ಲಿ ಭಾರತದ ಕಾರ್ಯಕ್ಷಮತೆಯು ನಿರಂತರ ಕುಸಿತದಲ್ಲಿದೆ. ಡಿಸೆಂಬರ್ ೨೦೨೧ ರಲ್ಲಿ ಬಿಡುಗಡೆಯಾದ ಇತ್ತೀಚಿನ ಮಾನವ ಸ್ವಾತಂತ್ರ್ಯ ಸೂಚ್ಯಂಕ ವರದಿಯ ಮೇರೆಗೆ ೨೦೧೯ರ ಡೇಟಾದ ಆಧಾರದ ಮೇಲೆ, ಭಾರತವು ೧೬೫ ದೇಶಗಳಲ್ಲಿ ೧೧೯ ನೇ ಸ್ಥಾನದಲ್ಲಿದೆ.

ಇದು ತೀವ್ರ ಕುಸಿತವನ್ನು ತೋರಿಸುತ್ತದೆ. ಭಾರತವು ೨೦೧೩ ರಲ್ಲಿ ೧೫೭ ದೇಶಗಳಲ್ಲಿ ೯೦ ನೇ ಸ್ಥಾನದಲ್ಲಿದ್ದಿತ್ತು.

೨೦೧೩ ರಿಂದ "ವೈಯಕ್ತಿಕ ಸ್ವಾತಂತ್ರ್ಯ" ಕ್ಕಾಗಿ ಭಾರತದ ಶ್ರೇಯಾಂಕವು ಕುಸಿದಿದ್ದರೂ, ಆ ಅವಧಿಯಲ್ಲಿ "ಆರ್ಥಿಕ ಸ್ವಾತಂತ್ರ್ಯ" ದ ಮೇಲೆ ಅದರ ಕಾರ್ಯಕ್ಷಮತೆ ಸ್ವಲ್ಪಮಟ್ಟಿಗೆ ಸುಧಾರಿಸಿದೆ ಎಂದು ಡೇಟಾ ತೋರಿಸಿದೆ.

ಭಾರತದ ಶ್ರೇಯಾಂಕವು ಅದರ ನೆರೆಯ ಚೀನಾ (೧೫೦), ಪಾಕಿಸ್ತಾನ (೧೪೫), ಮತ್ತು ಬಾಂಗ್ಲಾದೇಶ (೧೪೨) ಗಳಿಗಿಂತ ಉತ್ತಮವಾಗಿದೆ, ಆದರೆ ಅದು ನೇಪಾಳ (೮೪), ಭೂತಾನ್ (೯೮), ಮತ್ತು ಶ್ರೀಲಂಕಾ (೧೧೨) ಗಳಿಗಿಂತ ಕೆಟ್ಟದಾಗಿದೆ.

ವರದಿಯ ಪ್ರಕಾರ, ವಿಶ್ವದ ಶೇಕಡಾ ೮೩ ರಷ್ಟು ಜನರು ೨೦೦೮ ಮತ್ತು ೨೦೧೯ ರ ನಡುವೆ ಸ್ವಾತಂತ್ರ್ಯದ ಕುಸಿತವನ್ನು ಕಂಡಿದ್ದಾರೆ, ಇದು ಕೋವಿಡ್ -೧೯ ಸಾಂಕ್ರಾಮಿಕ ಮತ್ತು ಸಂಬಂಧಿತ ನಿರ್ಬಂಧಗಳಿಗೆ ಮುಂಚಿನ "ಗೊಂದಲಕಾರಿ ಪ್ರವೃತ್ತಿಯನ್ನು" ಪ್ರತಿನಿಧಿಸುತ್ತದೆ.

ವರದಿಯ ದತ್ತಾಂಶವು ಪ್ರಪಂಚದಾದ್ಯಂತ ಅತ್ಯಂತ ದೊಡ್ಡ ಕುಸಿತಗಳು ಅಭಿವ್ಯಕ್ತಿ ಸ್ವಾತಂತ್ರ್ಯ, ಧರ್ಮದ ಸ್ವಾತಂತ್ರ್ಯ ಮತ್ತು ಸಂಘಟನಾ ಸ್ವಾತಂತ್ರ್ಯ, ಸಭೆ ಮತ್ತು ನಾಗರಿಕ ಸಮಾಜದ ಕ್ಷೇತ್ರಗಳಲ್ಲಿವೆ ಎಂದು ತೋರಿಸುತ್ತದೆ. "ಭವಿಷ್ಯದ ವರದಿಗಳಲ್ಲಿ ಜಾಗತಿಕ ಸ್ವಾತಂತ್ರ್ಯ ಸೂಚಕಗಳಲ್ಲಿ ಕ್ಷೀಣಿಸುವುದನ್ನು ನಾವು  ನಿರೀಕ್ಷಿಸುತ್ತೇವೆ" ಎಂದು ವರದಿ ಹೇಳಿದೆ.

ಉನ್ನತ ಮಟ್ಟದ ಸ್ವಾತಂತ್ರ್ಯವು ಸಮೃದ್ಧಿ ಮತ್ತು ಯೋಗಕ್ಷೇಮದೊಂದಿಗೆ ಸಂಬಂಧಿಸಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ. ಅಗ್ರ ನಾಲ್ಕನೇ ಒಂದರಲ್ಲಿರುವ ದೇಶಗಳ ಪ್ರತಿ ವ್ಯಕ್ತಿಯ ಆದಾಯವು  ($೪೮,೭೪೮ ಅಥವಾ ಅಂದಾಜು ರೂ. ೩೭ ಲಕ್ಷ) ಕೆಳಗಿನ ನಾಲ್ಕನೇ ಒಂದರಲ್ಲಿರುವ ದೇಶಗಳ ಜನರ (ತಲಾ $ ೧೧,೨೫೯ಅಥವಾ ಅಂದಾಜು ರೂ. ೮.೬ ಲಕ್ಷ) ಆದಾಯಕ್ಕಿ೦ತ ಹೆಚ್ಚು ಎ೦ದು ಕ೦ಡುಬರುತ್ತದೆ  ಎಂದು ವರದಿ ಹೇಳಿದೆ.

ಭಾರತದ ಕಥೆ - ಏನು ಬದಲಾಗಿದೆ?

೨೦೦೮ ಮತ್ತು ೨೦೧೩ ರ ನಡುವೆ ಭಾರತವು ಮಾನವ ಸ್ವಾತಂತ್ರ್ಯ ಸೂಚ್ಯಂಕದಲ್ಲಿ ವಿಶ್ವದ ಅಗ್ರ  ೯೦ ದೇಶಗಳಲ್ಲಿ ಸ್ಥಾನವನ್ನು ಹೊ೦ದಿತ್ತು.

ಭಾರತದ ಶ್ರೇಯಾಂಕವು ೨೦೧೩ ರಲ್ಲಿ ೯೦ ಆಗಿತ್ತು, ಆದರೆ ಅದಾದನ೦ತರ ೨೦೧೪ ರಲ್ಲಿ ೧೦೬,  ೨೦೧೮ ರಲ್ಲಿ ೧೧೪ ಆಗಿದ್ದು  ೨೦೧೯ ರಲ್ಲಿ ೧೧೯ ಕ್ಕೆ ಕುಸಿದು ಇದುವರೆಗಿನ ತನ್ನ ಸಾರ್ವಕಾಲಿಕ ಕನಿಷ್ಠ ಮಟ್ಟವನ್ನು ತಲುಪಿತು. ಭಾರತ, ಹಂಗೇರಿ ಮತ್ತು ವೆನೆಜುವೆಲಾದ ಕುಸಿತದ ಶ್ರೇಯಾಂಕಗಳನ್ನು ಉಲ್ಲೇಖಿಸಿ, ವರದಿ  "ಒಟ್ಟಾರೆ ಸ್ವಾತಂತ್ರ್ಯದ ಮೇಲೆ ವಿವಿಧ ರೀತಿಯ ಜನಪರ ಆಡಳಿತದ ಪರಿಣಾಮಗಳನ್ನು" ತೋರಿಸಿದೆ ಎಂದು ವಿಮರ್ಶಿಸಿದೆ. .

೨೦೨೧ರ ಸೂಚ್ಯಂಕ

ಈ ಏಳನೇ ವಾರ್ಷಿಕ ಸೂಚ್ಯಂಕವು ಈ ಕೆಳಗಿನ ವಿಷಯಗಳಲ್ಲಿ ವೈಯಕ್ತಿಕ ಮತ್ತು ಆರ್ಥಿಕ ಸ್ವಾತಂತ್ರ್ಯದ ೮೨ ವಿಭಿನ್ನ ಸೂಚಕಗಳನ್ನು ಬಳಸುತ್ತದೆ:

# ಕಾನೂನಿನ ಅಚ್ಚುಕಟ್ಟಾದ ಆಚರಣೆ

# ಭದ್ರತೆ ಮತ್ತು ಸುರಕ್ಷತೆ

# ಚಲನವಲನ

# ಧರ್ಮ

# ಸಂಘ, ಸಭೆ ಮತ್ತು ನಾಗರಿಕ ಸಮಾಜ

# ಅಭಿವ್ಯಕ್ತಿ ಮತ್ತು ಮಾಹಿತಿ

# ಸಂಬಂಧಗಳು

# ಸರ್ಕಾರದ ಗಾತ್ರ

# ಕಾನೂನು ವ್ಯವಸ್ಥೆ ಮತ್ತು ಆಸ್ತಿ ಹಕ್ಕುಗಳು

# ಗಟ್ಟಿಮುಟ್ಟಾದ ಹಣ

# ಅಂತರರಾಷ್ಟ್ರೀಯ ವ್ಯಾಪಾರಕ್ಕೆ ಸ್ವಾತಂತ್ರ್ಯ

# ನಿಯಂತ್ರಣ

ವೈಯಕ್ತಿಕ ಮತ್ತು ಆರ್ಥಿಕ ಸ್ವಾತಂತ್ರ್ಯಗಳ ಎರಡು ವಿಶಾಲ ನಿಯತಾಂಕಗಳ ಜೊತೆಗೆ ಅಂಕಿಅಂಶಗಳ ಆಳವಾದ ನೋಟವು ಕೆಲವು ಆಸಕ್ತಿದಾಯಕ ಪ್ರವೃತ್ತಿಗಳನ್ನು ತೋರಿಸುತ್ತದೆ.

೨೦೧೩ಮತ್ತು ೨೦೧೯ರ ನಡುವೆ, ವೈಯಕ್ತಿಕ ಸ್ವಾತಂತ್ರ್ಯ ಸೂಚ್ಯಂಕದಲ್ಲಿ ಭಾರತದ ಶ್ರೇಯಾಂಕವು ೮೫ರಿಂದ ೧೧೯ ಕ್ಕೆ ಕುಸಿದಿದೆ.

“ವೈಯಕ್ತಿಕ ಸ್ವಾತಂತ್ರ್ಯ” ದ ನಿಯತಾಂಕವು ಕಾನೂನಿನ ನಿಯಮ ಪಾಲನೆ, ಭದ್ರತೆ ಮತ್ತು ಸುರಕ್ಷತೆ, ಚಲನೆಯ ಸ್ವಾತಂತ್ರ್ಯ, ಧರ್ಮದ ಸ್ವಾತಂತ್ರ್ಯ, ಸಭೆ ಸೇರುವ ಸ್ವಾತಂತ್ರ್ಯ,  ಪತ್ರಿಕಾ ಸ್ವಾತಂತ್ರ್ಯ, ಮತ್ತು ಸಲಿಂಗ ಸಂಬಂಧಗಳು ಮತ್ತು ವಿಚ್ಛೇದನದಂತಹ ವೈಯಕ್ತಿಕ ಜೀವನದಲ್ಲಿ ಆಯ್ಕೆ ಮಾಡಲು ವಿವಿಧ ಸ್ವಾತಂತ್ರ್ಯಗಳು ಸೇರಿದಂತೆ ಹಲವಾರು ಸೂಚಕಗಳನ್ನು ಒಳಗೊಂಡಿದೆ.

ಈ ವಿಶಾಲ ವಿಭಾಗದಲ್ಲಿ, ಭಾರತವು "ಸೆನ್ಸಾರ್ ಮಾಡಲು ಸರ್ಕಾರದ ಪ್ರಯತ್ನಗಳು" ಸೂಚಕದಲ್ಲಿ ಭಾರೀ ಕುಸಿತವನ್ನು ದಾಖಲಿಸಿದೆ. ಈ ನಿರ್ದಿಷ್ಟ ಅಂಕಿಅಂಶವನ್ನು ಸ್ವೀಡನ್ ಮೂಲದ ಥಿಂಕ್ ಟ್ಯಾಂಕ್ ವಿ-ಡೆಮ್ ಇನ್‌ಸ್ಟಿಟ್ಯೂಟ್‌ನ 'ಪ್ರಜಾಪ್ರಭುತ್ವದ ವೈವಿಧ್ಯತೆಗಳು' ಮಾಪನದಿಂದ ಪಡೆಯಲಾಗಿದೆ.

ಎಲ್ಲಾ ಅ೦ಕಗಳನ್ನು ಗರಿಷ್ಟ ೧೦ ಕ್ಕೆ ಅಳೆಯಲಾಯಿತು. ೨೦೧೪ ಕ್ಕಿಂತ ಮೊದಲು, ಈ ನಿರ್ದಿಷ್ಟ ಸೂಚಕಕ್ಕಾಗಿ ಭಾರತವು ಸರಾಸರಿ ೮.೬ ಅಂಕಗಳನ್ನು ಗಳಿಸಿತ್ತು, ಆದರೆ ೨೦೧೪-೧೯ ಅವಧಿಯಲ್ಲಿ ಅದು ೫.೨ ಕ್ಕೆ ಇಳಿದಿದೆ. ೨೦೧೯ ರಲ್ಲಿ, ಈ ಅ೦ಕ ೪.೧ ಕ್ಕೆ ಇಳಿದಿದೆ.

ಅಂತೆಯೇ, ಸೂಚ್ಯಂಕವು ನಾಗರಿಕ ಸಮಾಜದ ದಮನದಲ್ಲಿ (೨೦೧೩ ರ ಸರಾಸರಿ ೮.೨ ರಿಂದ ೨೦೧೯ ರ ಹೊತ್ತಿಗೆ ೫.೫), ನಾಗರಿಕ ಸಮಾಜದ ಪ್ರವೇಶ ಮತ್ತು ನಿರ್ಗಮನ (೬.೨ ರಿಂದ ೩.೯), ಧರ್ಮದ ಸ್ವಾತಂತ್ರ್ಯ (೭.೯ ರಿಂದ ೬.೧), ಅಭಿವ್ಯಕ್ತಿ ಸ್ವಾತಂತ್ರ್ಯ (೯.೩ ರಿಂದ ೭.೭)ಮತ್ತು ಧಾರ್ಮಿಕ ಸಂಘಟನೆಯ ನಿಗ್ರಹ (೮.೬ ರಿಂದ ೬.೬). ನಲ್ಲಿ ದೊಡ್ಡ ಕುಸಿತಗಳನ್ನು ದಾಖಲಿಸಿದೆ. ,

ಕೆಲವು ಸಕಾರಾತ್ಮಕ ಸೂಚಕಗಳು

ಆರ್ಥಿಕ ಸ್ವಾತಂತ್ರ್ಯಗಳಲ್ಲಿ, ಭಾರತವು ಸ್ವಲ್ಪಮಟ್ಟಿಗೆ ಸುಧಾರಿಸಿದೆ, ಅದರ ಶ್ರೇಣಿಯು ೨೦೧೩ ರಲ್ಲಿ ೧೧೧ ರಿಂದ ೨೦೧೯ ರಲ್ಲಿ ೧೦೮ ಕ್ಕೆ ಏರಿತು.

ಈ ನಿಯತಾಂಕವು ಸ್ವತ್ತುಗಳ ರಾಜ್ಯ ಮಾಲೀಕತ್ವ, ಬಂಡವಾಳ ಮತ್ತು ಜನರ ಚಲನೆ, ಹಣದುಬ್ಬರ, ನಿಯಂತ್ರಕ ವ್ಯಾಪಾರ ಅಡೆತಡೆಗಳು ಮತ್ತು ಕಾನೂನು ವ್ಯವಸ್ಥೆ ಮತ್ತು ಆಸ್ತಿ ಹಕ್ಕುಗಳ ಸದೃಢತೆಗೆ ಸಂಬಂಧಿಸಿದ ವಿವಿಧ ಅಂಶಗಳು.

ಕೆಲವು ಚಟುವಟಿಕೆಗಳ ಮೇಲಿನ ನಿರ್ಬಂಧಗಳನ್ನು ತೆಗೆದುಹಾಕಿದಾಗ ಭಾರತದಲ್ಲಿ ಆರ್ಥಿಕ ಸ್ವಾತಂತ್ರ್ಯವು ಸುಧಾರಿಸಿದೆ ಎಂದು ಡೇಟಾ ತೋರಿಸುತ್ತದೆ. ೨೦೧೪ ರವರೆಗೆ, ವಿದೇಶಿ ಕರೆನ್ಸಿ ಬ್ಯಾಂಕ್ ಖಾತೆಯನ್ನು ಹೊಂದುವ ಸ್ವಾತಂತ್ರ್ಯದ ವಿಷಯದಲ್ಲಿ ಭಾರತವು ೦ ಅನ್ನು ಗಳಿಸಿತು, ಆದರೆ ಇದು ೨೦೧೫ ರಲ್ಲಿ ೫ ಕ್ಕೆ ಏರಿತು (ಮತ್ತು ಅಲ್ಲಿ ಉಳಿದಿದೆ).

ಅಂತೆಯೇ, ಪರವಾನಗಿ ನಿರ್ಬಂಧಗಳ ಕಡಿತವು ಸಹ ಧನಾತ್ಮಕ ಪರಿಣಾಮ ಬೀರಿದೆ. ೨೦೦೮ ಮತ್ತು ೨೦೧೪ ರ ನಡುವೆ, ಭಾರತವು ಪರವಾನಗಿ ನಿರ್ಬಂಧಗಳಿಗಾಗಿ ಸರಾಸರಿ ೪.೬೨ ಅಂಕಗಳನ್ನು ಗಳಿಸಿದೆ, ಆದರೆ ೨೦೧೪ ರಿಂದ ೨೦೧೯ ರವರೆಗೆ, ಈ ಸರಾಸರಿ ಸ್ಕೋರ್ ೮.೬೨ ಕ್ಕೆ ಏರಿತು.

ಮಾನವ ಸ್ವಾತಂತ್ರ್ಯ ಮತ್ತು ಸಮೃದ್ಧಿಯೊಂದಿಗಿನ ಅದರ ಸಂಪರ್ಕಗಳು

ಒಂದು ದೇಶದ ಸ್ವಾತಂತ್ರ್ಯದ ಮಟ್ಟ ಮತ್ತು ಸಮೃದ್ಧಿಯ ನಡುವೆ "ಬಲವಾದ ಸಂಬಂಧ" ಇದೆ ಎಂದು ವರದಿ ಸೂಚಿಸುತ್ತದೆ.

ಸ್ವಿಟ್ಜರ್ಲೆಂಡ್, ನ್ಯೂಜಿಲೆಂಡ್, ಡೆನ್ಮಾರ್ಕ್, ಎಸ್ಟೋನಿಯಾ ಮತ್ತು ಐರ್ಲೆಂಡ್ ಮತ್ತು ಇತರ ಅಗ್ರ  ಸ್ವತಂತ್ರ ರಾಷ್ಟ್ರಗಳು ಕೆಳಗಿರುವ  ನಾಲ್ಕನೇ ಒ೦ದು ಭಾಗದ  ರಾಷ್ಟ್ರಗಳಿಗಿ೦ತ  ಎರಡು ಪಟ್ಟು ಹೆಚ್ಚು  ಸರಾಸರಿ ತಲಾ ಆದಾಯವನ್ನು ಅನುಭವಿಸುತ್ತವೆ.

ಯಾವ ಕಾರಣದಿ೦ದ ಯಾವ ಪರಿಣಾಮವನ್ನು ತಲುಪಲಾಗುತ್ತದೆ ಎ೦ಬದನ್ನು ಸೂಚಿಸಲು ಇದು ಸಾಕಾಗುವುದಿಲ್ಲ ಎಂದು ವರದಿ ಹೇಳುತ್ತದೆ, ಆದರೂ ಅಭಿವೃದ್ಧಿಗೆ ಮಾನವ ಸ್ವಾತಂತ್ರ್ಯ ಮುಖ್ಯವೇ ಎಂಬ ಪ್ರಶ್ನೆಯನ್ನು ಅದು ಹುಟ್ಟುಹಾಕುತ್ತದೆ.

ಶ್ರೇಯಾಂಕಗಳ ಪ್ರದೇಶವಾರು ವಿಶ್ಲೇಷಣೆಯು ಏಷ್ಯಾ ಮತ್ತು ಆಫ್ರಿಕಾಕ್ಕಿಂತ ಹೆಚ್ಚಾಗಿ ಅಭಿವೃದ್ಧಿ ಹೊಂದಿದ ಸಮಾಜಗಳ ಹೆಚ್ಚಿನ ಪ್ರಾಬಲ್ಯದೊಂದಿಗೆ ಉತ್ತರ ಅಮೆರಿಕಾ ಮತ್ತು ಪಶ್ಚಿಮ ಯುರೋಪ್‌ನಲ್ಲಿ ಮಾನವ ಸ್ವಾತಂತ್ರ್ಯವು ಹೆಚ್ಚಾಗಿರುತ್ತದೆ ಎಂದು ತೋರಿಸುತ್ತದೆ.

ನಾಗರಿಕ ಸ್ವಾತಂತ್ರ್ಯಗಳು ಆರ್ಥಿಕ ಸ್ವಾತಂತ್ರ್ಯಗಳೊಂದಿಗೆ ಪರಸ್ಪರ ಸಂಬಂಧ ಹೊಂದಿವೆ ಎಂದು ಲೇಖಕರು ಹೇಳುತ್ತಾರೆ. ಹೆಚ್ಚಿನ ಆರ್ಥಿಕ ಸ್ವಾತಂತ್ರ್ಯವನ್ನು ನೀಡುವ ದೇಶಗಳು ಉತ್ತಮ ವೈಯಕ್ತಿಕ ಸ್ವಾತಂತ್ರ್ಯದ ಅಂಕಗಳನ್ನು ಹೊಂದಿವೆ.

ಮಾನವ ಸ್ವಾತಂತ್ರ್ಯಗಳು ಪ್ರಜಾಪ್ರಭುತ್ವದ ಮಟ್ಟದೊಂದಿಗೆ ಧನಾತ್ಮಕವಾಗಿ ಸಂಬಂಧ ಹೊಂದಿವೆ ಎಂದು ವರದಿಯು ಉಲ್ಲೇಖಿಸುತ್ತದೆ. ಎಕನಾಮಿಸ್ಟ್ ಇಂಟೆಲಿಜೆನ್ಸ್ ಯುನಿಟ್‌ನ 'ಪ್ರಜಾಪ್ರಭುತ್ವ ಸೂಚ್ಯಂಕ'ವನ್ನು ಬಳಸಿಕೊಂಡು, ಪ್ರಜಾಪ್ರಭುತ್ವವು ಉತ್ತಮವಾದಷ್ಟೂ ಅದು ಹೆಚ್ಚು ವೈಯಕ್ತಿಕ ಸ್ವಾತಂತ್ರ್ಯವನ್ನು ನೀಡುತ್ತದೆ ಎಂದು ವರದಿಯು ಸಮರ್ಥಿಸುತ್ತದೆ.

"ಸ್ವಾತಂತ್ರ್ಯ ಮತ್ತು ಪ್ರಜಾಪ್ರಭುತ್ವದ ನಡುವೆ  ಬಲವಾದ ಸಂಬಂಧವಿದೆ ಎ೦ಬುದರಲ್ಲಿ ಆಶ್ಚರ್ಯವೇನಿಲ್ಲ,  ಸಂಶೋಧನೆಗಳ ಮೂಲಕ ಸಂಕೀರ್ಣ ಸಂಬಂಧವನ್ನು ಪ್ರಾಯೋಗಿಕವಾಗಿ ಪರೀಕ್ಷಿಸಲು ಅವು ಶ್ರೀಮಂತ ಅವಕಾಶಗಳನ್ನು ನೀಡುತ್ತವೆ.  ಈ ಎರಡು ಅ೦ಶಗಳ ನಡುವಿನ  ಕಾರಣ ಮತ್ತು ಪರಿಣಾಮದ ಸ೦ಬ೦ಧದ ಮೂಲಕ   ಬೆಂಬಲದ ದಿಕ್ಕು  ಕಾಲಾನಂತರದಲ್ಲಿ ಬಲಗೊಳ್ಳಬಹುದು ಅಥವಾ ದುರ್ಬಲಗೊಳಿಸಬಹುದು,  ಮತ್ತು ಅಭಿವೃದ್ಧಿಯ ಮಟ್ಟ ಹಲವಾರು ಇತರ ಅಂಶಗಳಿಂದ ಪ್ರಭಾವಿತವಾಗಬಹುದು” ಎಂದು ವರದಿ ಹೇಳಿದೆ.

ಆರ್ಥಿಕ ಸ್ವಾತಂತ್ರ್ಯವು "ಇತರ ಸ್ವಾತಂತ್ರ್ಯಗಳನ್ನು ಚಲಾಯಿಸಲು ವ್ಯಕ್ತಿಗಳಿಗೆ ಅಧಿಕಾರ ನೀಡುತ್ತದೆ" ಮತ್ತು "ಸ್ವಾತಂತ್ರ್ಯವನ್ನು ನಿರ್ಬಂಧಿಸುವ ಅಥವಾ ಅಧಿಕಾರವನ್ನು ಕೇಂದ್ರೀಕರಿಸಲು ಪ್ರಯತ್ನಿಸುವ" ಸಮಾಜದಲ್ಲಿನ ಸರ್ಕಾರಗಳ ಮತ್ತು ಇತರ ಶಕ್ತಿಗಳ ಮೇಲೆ ಜನರ  ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ ಎಂದು ವರದಿಯು  ಒತ್ತಿಹೇಳುತ್ತದೆ.

ಕ್ಯಾಟೊ ಇನ್‌ಸ್ಟಿಟ್ಯೂಟ್ ಅಧ್ಯಯನದ ಕುರಿತು ನಿಖಿಲ್ ರಾಂಪಾಲ್ ವರದಿಯನ್ನು

18 ಡಿಸೆಂಬರ್ 2021 ರಂದು ದಿ ಪ್ರಿ೦ಟ್ ನಲ್ಲಿ ಪ್ರಕಟಿಸಲಾಗಿದೆ.